▪️ထန်တလန်တိုက်ပွဲ ဆက်လက်ပြင်းထန်၊ စစ်ကောင်စီ လေကြောင်းမှရိက္ခာပို့ပေး
ဟန်နွေ/People’s Spring
ချင်းပြည်နယ် ဟားခါး-ထန်တလန်မြို့နယ်ကြား ကမ်တလန်း(Kiamtlang)ဒေသရှိ စစ်ကောင်စီတပ်စခန်းအပါအဝင် စခန်းအချို့ကို ချင်းပြည်ကောင်စီ ချင်းပြည်အစိုးရကာကွယ်ရေးတပ်ဖွဲ့များက တိုက်ခိုက်သိမ်းပိုက်ခဲ့ကြောင်း ချင်းသတင်းရင်းမြစ်က ပြောသည်။
အောက်တိုဘာ ၂၈ရက် စစ်ရေးအခြေအနေကို မေးမြန်းရာ ဟားခါးမြို့၌ တိုက်ပွဲပြင်းထန်ခဲ့သည်ဟု ၎င်းက ပြောသည်။
” ကမ်တောင်းပေါ့။ ဒေသဘာသာစကားနဲ့ဆိုရင် ကမ်တလန်းလို့ခေါ်တယ်။ အဲဒီမှာရှိတဲ့ စကစ ယာယီစခန်း ချင်းပြည်အစိုးရတပ်ဘက်က သိမ်းပိုက်နိုင်ခဲ့တယ်။ ပြီးရင် စကစ နေရာယူထားတဲ့ ရယ်အူးထန်းလို့ခေါ်တယ်။ အဲဒါလည်း သိမ်းပိုက်နိုင်ခဲ့တယ်။ နှစ်နေရာပေါ့။ ဟားခါးနဲ့ နီးစပ်တယ်။ဟားခါး – ထန်တလန်ကြားတော့ဖြစ်တယ်။ အဲဒီဘက်က နှစ်နေရာကို ကျနော်တို့ချင်းပြည်တပ်တွေက သိမ်းပိုက်နိုင်ခဲ့တာပါ”ဟု ချင်းသတင်းရင်းမြစ်က ပြောသည်။
ထို့အပြင် ထန်တလန်မြို့တွင်လည်း တိုက်ပွဲပြင်းထန်နေပြီး စစ်ကောင်စီက လေကြောင်းမှ ရိက္ခာခဲယမ်း ဖြည့်တင်းမှုရှိသည်ဟု ဆိုသည်။
အောက်တိုဘာ ၂၈ရက်တွင် ထန်တလန်မြို့ရှိ စစ်ကောင်စီ လက်ကျန် တပ်ဖွဲ့များထံ ရိက္ခာခဲယမ်းများ Y12 လေယာဉ်ဖြင့် ဖြည့်တင်းမှု ရှိသည်ဟု သတင်းရင်းမြစ်က ပြောသည်။
” ထန်တလန်ကတော့တိုက်ပွဲ အကြီး၊အငယ်ရှိပါတယ်။ စကစကလည်း သူတို့ တပ်ကုန်း ပြန်လည်ရရှိဖို့ ထိုးစစ်ဆင်တာရှိပါတယ်။ ကျနော်တို့ဘက်က ခုခံတာ အဲဒါမျိုးနဲ့ တိုက်ပွဲရှိပါတယ်”ဟု ချင်းသတင်းရင်းမြစ်က ပြောသည်။
ချင်းအမျိုးသားတပ်မတော်(CNA)၊ ချင်းဒေသကာကွယ်ရေးတပ်(CDF) တပ်များစုဖွဲ့ထားသည့် ချင်းပြည်ကောင်စီ တပ်ပေါင်းစုသည် ထန်တလန်မြို့သိမ်းပိုက်နိုင်ရေး ဇူလိုင်ကတည်းက ထိုးစစ်ဆင်နေခြင်းဖြစ်ပြီး စစ်ကောင်စီဘက်ကလည်း ဆုံးရှုံးထားသည့် တပ်စခန်းများ ပြန်လည် ရရှိရေး အင်အားဖြည့်ထိုးစစ်ဆင်လျက်ရှိသည်။
(ချင်းပြည်ကောင်စီ တပ်ဖွဲ့ဝင် ရဲဘော်များအား တွေ့ရစဉ်။ ဓာတ်ပုံ – The Chin Post)
ဟားခါးမြို့အနီး စခန်းသိမ်းတိုက်ပွဲ စစ်ကောင်စီတပ်အရာရှိတစ်ဦးအပါအဝင်လေးဦးကို ချင်းပူးပေါင်းတပ် အရှင်ဖမ်းမိ▪️စစ်ကောင်စီ
တပ် ၁၄ဦးသေဆုံးဟု ချင်းသတင်းရင်းမြစ်ပြော
▪️ထန်တလန်မြို့၉၀ ရာခိုင်နှုန်းကို ချင်းပူးပေါင်းတပ် ထိန်းချုပ်
ဟန်နွေ/People’s Spring
ချင်းပြည်နယ် ဟားခါးမြို့အနီးရှိ စစ်ကောင်စီ၏ ကမ်တောင်း(ဒေသအခေါ် ကမ်တလန်) စခန်းကို ချင်းပြည်ကောင်စီ ချင်းပြည်အစိုးရပူးပေါင်းတပ်များက ယမန်နေ့တွင် တိုက်ခိုက်သိမ်းပိုက်ခဲ့ရာ စစ်ကောင်စီတပ်မှ အရာရှိအပါအဝင် ၄ဦး အရှင်ဖမ်းမိခဲ့ကြောင်း ချင်းသတင်းရင်းမြစ်က ပြောသည်။
” မနေ့က ဟားခါးမြို့ပြင်အနီးမှာရှိတဲ့ ကမ်တောင်း(ကမ်တလန်း)စခန်းပေါ့နော်။ အဲဒီမှာ CNA ၊CDF ချင်းပြည်အစိုးရ ပူးပေါင်းတပ်တွေ က သိမ်းပိုက်နိုင်ခဲ့တဲ့အထဲမှာ ဖမ်းဆီးနိုင်တဲ့ လေးယောက်ဖြစ်ပါတယ်။ အဲဒီ စကစလေးယောက်မှာ တစ်ယောက်က မေဂျာအဆင့်ဖြစ်ပါတယ်။ နာမည်ကတော့ မသိနိုင်သေးဘူး”ဟု ချင်းသတင်းရင်းမြစ်က ပြောသည်။
ယမန်နေ့က ဟားခါးမြို့အနီး တိုက်ပွဲအတွင်း စစ်ကောင်စီတပ်စွဲထားသည့် နေရာ ၂ခုကို ချင်းအမျိုးသားတပ်မတော်(CNA)၊ ချင်းဒေသကာကွယ်ရေးတပ်(CDF) ပူးပေါင်းထားသည့် ချင်းပြည်ကောင်စီ အစိုးရတပ်များက သိမ်းနိုင်ခဲ့ခြင်းဖြစ်သည်ဟု ဆိုသည်။ ယင်းအနက် ကမ်တလန် စခန်းသိမ်းပိုက်မှုအတွင်း စစ်ကောင်စီတပ်က သေဆုံးသူများလည်းရှိခဲ့သည်ဟု သတင်းရင်းမြစ်က ပြောသည်။
” လက်နက်ခဲယမ်းတွေလည်း ရပါတယ်။ စကစတွေကလည်း အလောင်းရှိပါတယ်။ပြီးရင် ဒဏ်ရာရပြီး ဟားခါးဆေးရုံမှာ သွားပြီး မှ သေဆုံးတဲ့သူတွေ ပေါင်းမယ်ဆိုရင် စကစဘက်မှာ ၁၄ယောက် ကျတယ်လို့ သိရပါတယ်။ ကျနော်တို့ ဘက်ကတော့ အဆင်ပြေပါတယ်”ဟု ချင်းသတင်းရင်းမြစ်က ပြောသည်။
တစ်ဖက်တွင်လည်း ချင်းပြည်ကောင်စီ ပူးပေါင်းတပ်သည် ထန်တလန်မြို့ အပြီးသတ်သိမ်းနိုင်ရေး ထိုးစစ်ဆင်လျက်ရှိရာ စစ်ကောင်စီတပ်က အင်အားအများအပြား ဖြည့်တင်းပြီး လေကြောင်းပစ်ကူဖြင့် စစ်ကူပေးတိုက်ခိုက်ခဲ့၍ ထန်တလန်မြို့သို့ စစ်ကောင်စီတပ် စစ်ကူ စစ်ကြောင်းပူးပေါင်းလာနိုင်ခဲ့သည်ဟု သတင်းရင်းမြစ်က ပြောသည်။
” ဟားခါးကနေ စစ်ကြောင်းထိုးလာတဲ့အထဲမှာ ၁၅၀လောက်က ဟားခါးကနေ လာတဲ့သူတွေကို လေယာဉ်ကနေ ပစ်ကူတာကြောင့် ထန်တလန်မြို့ထဲ ဝင်နိုင်တာ။ အော်တိုတောင်ရဲ့တောင်ထိပ်ကို သူတို့က ထိန်းချုပ်နိုင်တယ်။ ဒါပေမဲ့ အော်တိုတောင်မှာ ၃နေရာရှိတယ်”ဟု သတင်းရင်းမြစ်က ပြောသည်။
အော်တိုတောင်နှင့် C3တောင်ကို စစ်ကောင်စီက ပြန်လည်ထိန်းချုပ်နိုင်သည်မှာ မှန်ကန်သော်လည်း အော်တိုတောင်၌ ချင်းပူးပေါင်းတပ်ဖွဲ့များလည်းရှိဟု ၎င်းက ဆိုသည်။
အော်တိုတောင်သည် ထန်တလန်နှင့် ၇မိုင်ခန့်ဝေးသည့် နေရာဖြစ်ပြီး ဟားခါးနှင့် ထန်တလန် မြို့နယ်ကြားရှိသည်ဟု ဆိုသည်။
” ဒါပေမဲ့ ထန်တလန်ပြန်လည်ထိန်းချုပ်နိုင်တယ်ဆိုတာက ကောလာဟလဖြစ်တယ်။ ထန်တလန် စစ်ကောင်စီတပ်ကုန်းကလည်း ကျနော်တို့ အခုအချိန်ထိ ထိန်းချုပ်နိုင်ဆဲဖြစ်တယ်။ သူတို့က ပြန်လည်ထိန်းချုပ်နိုင်ဖို့ ထိုးစစ်ဆင်တယ်။ ကျနော်တို့က ပြန်ခုခံတယ်။ အခုထိမရသေးဘူးပေါ့။ ပြီးရင် သူတို့က ထန်တလန်မြို့ပေါ် တပ်ဖြန့်တာမျိုးမဟုတ်ဘူး။ သူတို့တပ်စွဲထားတဲ့ နှစ်နေရာပေါ့ ရဲစခန်းနဲ့ NLD ရုံးမှာပေါ့။ အဲဒီမှာပဲသွားပူးပေါင်းတယ်။ အဲဒီလိုမျိုး နေ့တိုင်းလိုလို တိုက်ပွဲဖြစ်တယ်” ဟု ချင်းသတင်းရင်းမြစ်က ပြောသည်။
လက်ရှိတွင် ထန်တလန်မြို့၏ ၉၀ ရာခိုင်နှုန်းကို ချင်းပြည်ကောင်စီ ပူးပေါင်းတပ်က ထိန်းချုပ်ဘထားဆဲဖြစ်သည်ဟုလည်း သတင်းရင်းမြစ်က ပြောပြသည်။
ထန်တလန်တိုက်ပွဲနှင့် ဟားခါးစခန်းသိမ်းတိုက်ပွဲ အခြေအနေများကို ဆက်လက်စုံစမ်းနေဆဲဖြစ်သည်။
(ဟားခါးမြို့အနီးရှိ စစ်ကောင်စီ၏ ကမ်တောင်း (ဒေသအခေါ် ကမ်တလန်)စခန်းတိုက်ပွဲအတွင်း ဖမ်းမိသော သုံ့ပန်းများ။ ဓာတ်ပုံ – ပေးပို့)
ဆက်လက်ဖတ်ရှုရန်
