စစ်ကိုင်းတိုင်း၊ မုံရွာမြို့တွင် နေအိမ် ခြောက်အိမ်ခန့် ဓါးပြတိုက်ခံရကြောင်း မုံရွာကင်းထောက်များအဖွဲ့က ပြောသည်။
ယခု အောက်တိုဘာနောက်ဆုံးပတ်အတွင်း မုံရွာမြို့၊ ရေကူးကန်လမ်းပေါ်၊ မဇ္ဇိမရောင်ခြည် ကျောင်း ဝန်းကျင်ရှိ နေအိမ် ခြောက်အိမ်ခန့် ဓါးပြတိုက်ခံရပြီး အိမ်ရှင်များမှာ ရန်ပြုခံရမည်စိုး၍ သတင်းဖုံးဖိထားကြောင်း မုံရွာကင်းထောက်များအဖွဲ့က ပြောသည်။
“အိမ်ရှင်တွေက နောက်ရန်ကြောက်ကြလို့ ဘယ်သူ့ကိုမှ မပြောရဲကြဘူး။လာတိုက်တဲ့သူတွေက ဘေးတွဲနဲ့။ ညနေ ၆ နာရီပတ်ဝန်းကျင်တွေပဲ။
လူ ၅ ယောက်နဲ့ လာတိုက်သွားတာ။”ဟု မုံရွာကင်းထောက်များအဖွဲ့တာဝန်ရှိသူက ပြောသည်။
ဓါးပြတိုက်ခံရမှုကြောင့် ဆုံးရှုံးသွားသည့် ငွေကြေးနှင့်ပစ္စည်းဥစ္စာ ပမာဏကိုလည်း မသိရသေးပေ။
ထို့အပြင် အဆိုပါလမ်း၌ ဖြတ်သန်းသွားလာသူများလည်း မကြာခဏ ဓါးပြတိုက်ခံနေရကြောင်း မုံရွာမြို့ခံအချို့က ပြောသည်။
” အဲလမ်းက လူလည်းပြတ်တယ်။ နေ့ခင်း၊နေ့လယ်ပါ ဆိုင်ကယ်နဲ့သွားလို့မကောင်းဘူး။ ဖြတ်တဲ့သူတွေကိုပါ ပေါ်တင် ဓါးပြထွက်တိုက်တာ။ ဆိုင်ကယ်တားရင်း ဓါးနဲ့ထောက်တာ။ ဖုန်းပါဖုန်းပေးခဲ့။ ဆိုင်ကယ်ပေးခဲ့။ အကုန်ခြေကျင်ပြန်ခိုင်းတာ။”ဟု မုံရွာမြို့ခံတစ်ဦးက ပြောသည်။
ပြီးခဲ့သည့် စက်တင်ဘာအတွင်းက မုံရွာမြို့ပေါ်ရှိ ရွှေဆိုင်တစ်ဆိုင်အား လက်နက်ကိုင်ဆောင်ထားသောလူတစ်စုက ဓားပြတိုက်ခဲ့ရာ ကျူးလွန် သူများအနက် သုံးဦးအား မုံရွာမြို့နယ်ပြည်သူ့ကာကွယ်ရေးအဖွဲ့(ပကဖ)က ဖမ်းဆီးရမိခဲ့သည်။
ပြီးခဲ့သည့် စက်တင်ဘာ ၂၅နှင့် ၂၆ရက်က မုံရွာမြို့ပေါ်ရှိ ရွှေဆိုင်တစ်ဆိုင်အပါအဝင် နေရာသုံးခုတွင် ဓါးပြတိုက်ခံခဲ့ရသည်။
စစ်ကောင်စီအာဏာသိမ်းပြီးနောက်ပိုင်း မုံရွာမြို့ပေါ်ရှိ ရွှေဆိုင်များ၊ ဖုန်းဆိုင်စတိုးဆိုင်များ၊ လူနေအိမ်များ ဓါးပြတိုက်ခံရပြီး လူထိခိုက်သေဆုံးမှုများပင် ရှိခဲ့သည်။
၂၀၂၂ စက်တင်ဘာ ၁၁ ရက်က မုံရွာမြို့လယ်မီးပွိုင့်အနီးရှိ သန်းတရာရွှေဆိုင် ဓါးပြတိုက်ခံရပြီး ရွှေအချိန်(၁၀)ပိဿာကျော် ပါသွားခဲ့သည်။
၂၀၂၂ ဒီဇင်ဘာ ၂၀ရက်ကလည်း မုံရွာမြို့၊ ဗိုလ်ချုပ်လမ်းပေါ်ရှိ ရွှေမုံရွာ ရတနာရွှေဆိုင်ဓားပြတိုက်ခံရပြီး ဆိုင်ရှင်အမျိုးသားပါ သေနတ်ဖြင့် ပစ်ခတ်ခံခဲ့ရသည်။
၂၀၂၃ မတ်လ ၂၁ရက်ကလည်း မုံရွာမြို့၊ ဗိုလ်ချုပ်လမ်းပေါ်ရှိ ပေါ်ဦးရွှေဆိုင်ဓါးပြတိုက်ခံရပြီး ဆိုင်ရှိ ရွှေထည်၊ရွှေတုံးများ ပိဿာလိုက်ပါသွားပြီး ကျပ်သိန်းထောင်ချီလည်း ယူဆောင်သွားသည်။
(မုံရွာမြို့ပေါ်တနေရာအား တွေ့ရစဥ်။ဓာတ်ပုံ-CJ)
မုံရွာမြို့ ချင်းတွင်းမြစ်ဆိပ်ရှိ မော်တော်များပေါ်မှ ခရီးသည်များအပါအဝင် ၁၇ဦးခန့်ကို စစ်ကောင်စီ ဖမ်းဆီး
စစ်ကိုင်းတိုင်း၊ မုံရွာမြို့၊ ချင်းတွင်းမြစ်ဆိပ်၌ ဆိုက်ကပ်ထားသော မော်တော်များပေါ်မှ ခရီးသည်များအပါအဝင် ပြည်သူ ၁၇ဦးခန့် ဖမ်းဆီးခံရကြောင်း သတင်းရရှိသည်။
ယမန်နေ့(အောက်တိုဘာ ၂၉ရက်)ညပိုင်းက မုံရွာမြို့၊ ချင်းတွင်းမြစ်ဆိပ်၊ လှည်းဂိတ်အနီးရှိမော်တော်များပေါ်မှ မော်တော်ပိုင်တစ်ဦး၊ ခရီးသည်များအပါအဝင် ၁၇ဦးခန့်အား စစ်ကောင်စီတပ်က ဖမ်းဆီးသွားကြောင်း မုံရွာရပ်ကွက်ကင်းထောက်များအဖွဲ့က ပြောသည်။
“မော်တော်ပေါ်ကလူတွေက ခန္တီးတို့ ဟုမ္မလင်းတို့တက်ကြမယ့်လူတွေ။ ကားလမ်းတွေက သွားမရတော့ ရေလမ်းကသွားကြရတာ။ အကုန်အဖမ်းခံရတာ။”ဟု မုံရွာမြို့ခံတစ်ဦးက ပြောသည်။
ပြည်သူများအား မည်သည့်အတွက်ကြောင့် ဖမ်းဆီးသွားသည်ကိုမူ မသိရသေးကြောင်း၊ ယနေ့နံနက်ပိုင်းတွင်မူ လွတ်မြောက်လာသူအချို့ ရှိသော်လည်း အများစုမှာ ဆက်လက်ဖမ်းဆီးခံထားရကြောင်း ဒေသခံများက ပြောသည်။
“ဒီနေ့လည်း လှည်းဂိတ်အဆင်းက မော်တော် ဆိပ်မှာပဲ မနက်ကတည်းက အိမ်စီးကား သုံးစီးလာပြီး တစ်နေ့လုံးစောင့်ကြည့်စစ်ချင်တဲ့သူစစ်နေတယ်။ တာရိုးအောက် ကမ်းနားထိဆင်းစောင့်နေကြတာ။ ညနေ ၅ နာရီအထိတော့ အဖမ်းအဆီးမရှိသေးဘူး။”ဟု မုံရွာရပ်ကွက်ကင်းထောက်များအဖွဲ့က ပြောသည်။
ဖမ်းဆီးခံရသည့် ပြည်သူများ၏ အသေးစိတ်အချက်အလက်များအား မသိရသေးပေ။
မုံရွာမြို့ပေါ်တွင် စစ်ကောင်စီတပ်က လူငယ်၊ လူရွယ်များအား စစ်မှုထမ်းရန် ဖမ်းဆီးနေပြီး နေဝင်ပြီဆိုသည်နှင့်တပြိုင်နက် နေအိမ်အတွင်း၌သာ နေထိုင်နေရကြောင်း မြို့ခံများက ပြောသည်။
မုံရွာမြို့နယ်သည် တော်လှန်ရေးအားကောင်းရာဒေသတစ်ခုဖြစ်ပြီး စစ်ကောင်စီ၏ ဖမ်းဆီး၊နှိပ်စက်၊ သတ်ဖြတ်ခြင်း၊ မီးရှို့ဖျက်ဆီးခြင်း၊ လက်နက်ကြီးဖြင့် ပစ်ခတ်ခံရခြင်းများ မကြာခဏ ဖြစ်ပွားနေသည်။
People’s Spring
(ချင်းတွင်းမြစ်ကမ်းသို့ဆင်းလာသော စစ်ကောင်စီယာဥ်များအား ယမန်နှစ်အတွင်းက တွေ့ရစဥ်။ဓာတ်ပုံ-CJ)
ဆက်လက်ဖတ်ရှုရန်
