ဖေဖော်ဝါရီ ၅
စစ်အာဏာရှင် အမြစ်ဖြတ်နိုင်ရေး တိုင်းရင်းသားလက်နက်ကိုင်အဖွဲ့များ အကြား ကူညီရိုင်းပင်းရန်နှင့် ပြဿနာများ မဖြစ်ပွား စေရေး သတိပြုကြရန် KIO ဥက္ကဋ္ဌ ဗိုလ်ချုပ်ကြီး အင်ဘန်လက သတိပေးပြောဆိုလိုက်သည်။
ယနေ့ ကျရောက်သည့် ၆၄ နှစ်မြောက်ကချင်တော်လှန်ရေးနေ့တွင် ၎င်းက လိုင်ဇာTV မှတစ်ဆင့် အထက်ပါအတိုင်း ပြောဆိုသတိပေးလိုက်ခြင်းဖြစ်သည်။
မြန်မာနိုင်ငံတွင် စစ်အာဏာရှင်စနစ်ကို အမြတ်ဖြတ်နိုင်ရေးသည် အလွန်အရေးကြီးကြောင်း၊ စစ်အာဏာရှင်စနစ်ကို တော်လှန်တိုက်ခိုက်နေသော တိုင်းရင်းသားလက်နက်အဖွဲ့များအကြား ပြဿနာမဖြစ်ပွားစေရေးနှင့် အချင်းချင်း ကူညီရိုင်းပင်းရေး သတိပြုကြရန် ဗိုလ်ချုပ်ကြီး အင်ဘန်လက တိုက်တွန်း ပြောဆိုသည်။
“လက်နက်ကိုင် တော်လှန်နေကြသူများ ခင်ဗျာ။ စစ်အာဏာရှင်စနစ်ကို ချုပ်ငြိမ်းနိုင်ဖို့က အဓိကဖြစ်ပါတယ်။ အချင်းချင်း ကူညီထောက်ပံ့ကြဖို့ လိုအပ်ရုံ သာမက အချင်းချင်းကြား ပြဿနာတွေ မပေါ်ပေါက်အောင် သတိနဲ့ဆောင်ရွက်ကြပါစို့။
နိုင်ငံရေး ဆွေးနွေးပွဲမှာ ဆွေးနွေးအဖြေရှာဆုံးဖြတ်ရမယ့် ကိစ္စတွေကို အချိန်မတိုင်မီ ဦးစားပေးဖြေရှင်းတာမျိုး မလုပ်ကြပါစို့။ လက်နက်ကိုင်အဖွဲ့တွေ အချင်းချင်း အပြန်အလှန် လေးစားအသိအမှတ်ပြု စည်းဘောင်ထားရှိပြီး ဘုံရန်သူကို တိုက်ခိုက်ဖို့ လိုအပ်ပါတယ်” ဟု ဗိုလ်ချုပ်ကြီး အင်ဘန်လက ပြောဆိုသည်။
လက်ရှိ ရှမ်းပြည်နယ်မြောက်ပိုင်းတွင် နယ်မြေလု အငြင်းပွားမှုများ အဖြစ်များနေပြီး လူအင်အား၊ စစ်လက်နက်အင်အား ဖြင့် နယ်မြေချဲ့ ထွင်အုပ်စိုးနိုင်ခြင်းမဟုတ်ကြောင်း၊ ဒေသပြည်သူများ၏ ထောက်ခံမှု ပါဝင်ရမည်ဆိုသည်ကို နားလည်သိရှိကြရန် လိုအပ်ကြောင်း ၎င်းက ဆက်လက်ပြောဆိုသည်။
အကြမ်းဖက် စစ်ခေါင်းဆောင် မင်းအောင်လှိုင်နှင့် စစ်ဗိုလ်ချုပ်များအနေဖြင့် ငြိမ်းချမ်းရေးကို စစ်မြေပြင်တွင် အဖြေရှာခြင်း မပြုဘဲ ဆုပ်ကိုင်ထားသည့်အာဏာကို နိုင်ငံတော်ငြိမ်းချမ်းရေးအတွက် အသုံးပြုရန်လည်း ၎င်းက တိုက်တွန်းပြောဆိုသည်။
ထို့ပြင် ပြည်တွင်းနိုင်ငံရေးပါတီများအနေဖြင့်လည်း ပြည်သူလူထုဘက်မှ ရပ်တည်ပြီး ပြည်သူ့အကျိုးစီးပွားကို ထမ်းဆောင်နိုင်သည့် နိုင်ငံရေးပါတီများဖြစ်စေရန် ခိုင်မာသည့် ခံယူချက်ဖြင့် ရပ်တည်စေလိုကြောင်း၊ စစ်ကောင်စီနှင့်အတူ ကျဆုံးသွားသည့် ပါတီများ မဖြစ်စေလိုကြောင်း ၎င်းက အကြံပြုသည်။
ကချင် လွတ်လပ်ရေးအဖွဲ့ (Kachin Independence Organization – KIO) ကို ၁၉၆၀ ခုနှစ် အောက်တိုဘာ ၂၅ ရက်နေ့တွင် ဖွဲ့စည်းခဲ့ပြီး ကချင်လွတ်လပ်ရေးကောင်စီ (Kachin Independence Council – KIC) ကို ၁၉၆၁ ခုနှစ် ဇန်နဝါရီလတွင် ဖွဲ့စည်းခဲ့ကာ ကချင်လွတ်လပ်ရေးတပ်မတော် (Kachin Independence Army – KIA) ကို ၁၉၆၁ ဖေဖေါ်ဝါရီ ၅ ရက်နေ့မှာ စတင်ဖွဲ့စည်းခဲ့ကြောင်း သိရှိရသည်။
ကိုးကား-Kachinwaves ။
