ဖေဖော်ဝါရီ ၅ ရက်
ဧရာဝတီတိုင်း၊ သာပေါင်းမြို့နယ်အတွင်းရှိ စစ်ကောင်စီစခန်းတစ်ခုကို အာရက္ခတပ်တော် (AA) နှင့်ပူးပေါင်းတပ်များက ထပ်မံသိမ်း ပိုကိနိုင်ခဲ့ပြီး စစ်ကောင်စီတပ် အရာရှိနှင့်တပ်ဖွဲ့ဝင် အများအပြား ထိခိုက်သေဆုံးကြောင်း စစ်ရေးသတင်းရင်းမြစ်ထံက သိရသည်။
သာပေါင်းမြို့နယ်၊ ကျားခေါင်းရွာရှိ စစ်ကောင်စီစခန်းတစ်ခုကို ပြီးခဲ့သည့် ဖေဖော်ဝါရီ ၃ ရက်နေ့တွင် AA နှင့်ပူးပေါင်းတပ်ဖွဲ့များ တိုက်ခိုက်သိမ်းပိုက်နိုင်ခဲ့ခြင်း ဖြစ်သည်။
“ကျားခေါင်းက ဒေသအခေါ်ချောင်းဖျားလို့လည်းခေါ် ကြတယ်။ အဲဒီကနေ ငါးသိုင်းချောင်း ရေကြည် ဘက်ကို တက်လို့ရတယ်။ ဘောမိကနေ အဲဒီမှာဆက်ပြီးတိုက်ပွဲဖြစ်နေတာ။ ခုအဲဒီစခန်းကျ သွားပြီ”ဟု စစ်ရေး သတင်းရင်းမြစ်က ဧရာဝတီတိုင်းမ်ကို ပြောသည်။
အဆိုပါတိုက်ပွဲတွင် စစ်ကောင်စီဘက်မှ ဗိုလ်ကြီးအဆင့်အပါအဝင် စစ်သည်အများအပြား ထိခိုက် သေဆုံးမှု များပြီး ဒဏ်ရာရရှိသူများကို ပုသိမ် ဆေးတပ်ရင်း ၄ သို့ပို့ဆောင်ခဲ့ကြောင်း သိရသည်။
ရခိုင်နှင့် ဧရာဝတီတိုင်းအစပ်တွင် ဖြစ်ပွားလျက်ရှိသည့် တိုက်ပွဲများတွင် စစ်ကောင်စီတပ်မှ လေ့ကျင့်ရေး တပ်သားများနှင့် ထုတ်နုတ်အင်အားများကို ပို့ ဆောင်နေသော်လည်း ထွက်ပြေးသူများပြားကာ သေဆုံးနှင့် ထိခိုက်ဒဏ်ရာရရှိသူများကိုသာ ဖောကားများဖြင့် ပြန်လည်သယ်ဆောင်လာသည်ကို တွေ့ရကြောင်း ဒေသခံများထံက သိရသည်။
ထို့အပြင် ဖေဖော်ဝါရီ ၃ ရက်နေ့က ကျုံပျော်မြို့ရှိ ခလရ ၃၆ တပ်ရင်းမှ ကင်းထောက်ခြင်းနှင့်ဗုံးကြဲခြင်း များပြုလုပ်နေသည့် စက်တပ်လေထီးများကိုစေလွှတ်ရာ ခြောက်စီးအနက် ငါးစီးသာပြန်လည်ရောက်ရှိ လာကြောင်းနှင့် ယင်းစက်တပ်လေထီးများမှာ ညအချိန်များတွင်ပင် ပျံသန်း၍ ကင်းထောက်နေကြောင်း သိရသည်။
AA နှင့်ပူးပေါင်းတပ်တို့သည် ဧရာဝတီတိုင်းအတွင်းရှိ ပွိုင့် ၂၆၃ နှင့် ပွိုင့် ၃၆၉ စခန်းတို့ကို သိမ်းပိုက်ပြီးနောက် သားပေါင်းမြို့နယ်ထဲရှိ ကျားခေါင်းရွာစခန်းကို ထပ်မံသိမ်းပိုက်နိုင်ခဲ့ခြင်းဖြစ်သည်။
ယင်းကျားခေါင်းရွာစခန်းတိုက်ပွဲမှာ ပြီးခဲ့သည့် ဇန်နဝါရီနောက်ဆုံးပတ်ကတည်းက တိုက်ပွဲ ဖြစ်ပွားနေခြင်းဖြစ်ပြီး သာပေါင်းမြို့မရဲစခန်းမှူး ဒုရဲမှူးဝင်းနိုင်ဦးသည် ရိက္ခာနှင့်တပ်အင်အားများ ပို့ဆောင်စဉ် AA ၏စနိုက်ဘာပစ်ခတ်မှုကြောင့် ပြီးခဲ့သည့် ဇန်နဝါရီ ၂၈ ရက်နေ့က သေဆုံးခဲ့သည်။
ဓာတ်ပုံ-AA
ပုံစာ-ရခိုင်နှင့်ဧရာ၀တီ အစပ်တွင် တွေ့ရသည့် AA တပ်ဖွဲ့ဝင်များ
