ဖေဖော်ဝါရီ ၅ ရက်
ပဲခူးတိုင်း၊ ပန်းတောင်းမြို့နယ်၊ ညောင်ကျိုးကျေးရွာ၌ အထူးခံစစ်ပြင်ထားသည့် စစ်ကောင်စီစခန်းကို အာရက္ခတပ်တော် (AA) နှင့်ပူးပေါင်းတပ်ဖွဲ့များက ဝင်ရောက်တိုက်ခိုက်နေပြီး စစ်ကောင်စီတပ်မှ ထိခိုက်သေဆုံးမှုများကြောင်း သိရသည်။
တောင်ကုတ်နှင့် ပဲခူးအစပ်ရှိ တောင်ပုံကြီးစခန်း AA လက်ထဲကျရောက်ပြီးနောက် စစ်ကောင်စီတပ်များ ပဲခူးတိုင်းအတွင်းရှိ မိုးထိဗျူဟာတွင် ခံစစ်ပြင် ခုခံခဲ့သော်လည်း မိုးထိဗျူဟာကိုပါ AA က သိမ်းပိုက်ခဲ့သည်။
တော်လှန်ရေးတပ်ဖွဲ့များ၏ ထိုးစစ်မှာ ပဲခူးတိုင်း ပန်းတောင်းမြို့နယ်အတွင်းရှိ ညောင်ကျိုးသို့ ရောက်ရှိလာပြီး စစ်ကောင်စီ၏ စစ်လက်နက် ပစ္စည်းထုတ်စက်ရုံ (ကပစ) များထံမှ အင်အားများကို တိုက်ပွဲဖြစ်နေသည့် ညောင်ကျိုးသို့ ပို့ဆောင်ခဲ့ကြောင်း သိရသည်။
“ခုတိုက်ပွဲတွေက ပန်းတောင်းမြို့နယ်ထဲကိုရောက်နေပြီလို့ပြောရမယ်။ ညောင်ကျိုး ပုဂံကွဲဆိုတာ ပန်းတောင်းထဲမှာပါ။ တိုက်ပွဲပြင်းထန်နေပါတယ်”ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
ညောင်ကျိုး တိုက်ခိုက်ခံနေရချိန်တွင် စစ်ကောင်စီက ကပစစက်ရုံများရှိသည့် ညောင်ခြေထောက် ကျေးရွာတွင်ပါ ခံစစ်အခိုင်အမာပြင်ဆင်နေကြောင်း သိရသည်။
“ကပစစက်ရုံတွေက လက်ရှိမှာ ထုတ်လုပ်ဖို့ထက် ကာကွယ်ဖို့အဓိကဖြစ်နေတယ်။ တိုက်ပွဲဖြစ်နေတဲ့ ညောင် ကျိုးနဲ့ ကပစစက်ရုံရှိတဲ့ ညောင်ခြေထောက်နဲ့က လက်နက်ကြီးတစ်ကမ်းပဲကွာတော့တယ်။ AA ရဲ့ လက်နက်ကြီးပစ်စွမ်းရည်ကလည်း မသေးတော့ ညောင်ကျိုးကျသွားရင် ကပစစက်ရုံတွေအတွက် မလွယ်ဘူး”ဟု CDM ဗိုလ်ကြီးဇင်ယော်က ဧရာဝတီ တိုင်းမ်ကို ပြောသည်။
ညောင်ခြေထောက်ကျေးရွာတွင် ကပစ (၆) နှင့် အမှတ် (၁၀၆) ဒုံးတပ်ရင်းတို့တည်ရှိပြီး တိုက်ပွဲ ဖြစ်ပွားနေသည့် ညောင်ကျိုးနှင့် မိုင်အနည်းငယ်ခန့်သာကွာဝေးပြီး ကြားထဲတွင် မည်သည့်တပ်စခန်းမျှ မရှိကြောင်း သိရသည်။
ညောင်ကျိုး ထိုးစစ်ဆင်တိုက်ခိုက်ခံနေရသည့် အတွက် စစ်ကောင်စီက ပုဂံကွဲကျေးရွာ စာသင်ကျောင်း မှနေ၍ လက်နက်ကြီးပစ်ကူများပေးနေပြီး ပြည်ဘက်မှနေ၍ အင်အားအများအပြားပို့ဆောင်လျက် ရှိကြောင်း သိရသည်။
ညောင်ကျိုးတိုက်ပွဲတွင် ပို့လွှတ်ခံရသည့် အင်အားအများစုမှာ တောင်ပုံကြီးနှင့် မိုးထိတောင်မှ ထွက်ပြေး တပ်ဆုတ်လာသည့် ထုတ်နုတ်အင်အားများဖြစ်ပြီး ဥသျှစ်ပင်နှင့် ပြည်ဘက်မှ ခေါ်ယူလာသည့် တပ်ဖွဲ့ဝင်များဖြစ်ကြောင်း သိရသည်။
ခံစစ်ပြင်နေသည့် စစ်ကောင်စီတပ်ဖွဲ့ဝင်များသည် သိမ်းပိုက်ခံလိုက်ရသော တပ်စခန်းနှစ်ခုမှထွက်ပြေး ဆုတ်ခွာလာသည့် အင်အားများဖြစ်သည့်အတွက် ညောင်ကျိုးတွင် နေ့စဉ်စခန်းစွန့်ခွာ ထွက်ပြေးမှု များရှိနေပြီး ပြန်လည်ဖမ်းမိသူများကို အပြစ် ပေးအချုပ်ချထားကြောင်း သိရသည်။
တိုက်ပွဲမှာ ပန်းတောင်းမြို့နယ်အတွင်းသို့ ရောက်ရှိလာပြီဖြစ်ပြီး ကပစ (၃) ၊ ကပစ (၉) နှင့် ကပစ (၅) တို့တည်ရှိသည့်အတွက် စစ်ကောင်စီက ညောင်ကျိုးမကျစေရေး အပြင်းအထန်ခုခံနေရကြောင်း သိရသည်။
ပန်းတောင်းရှိ စစ်လက်နက်ပစ္စည်းထုတ်စက်ရုံများမှာ ပေါင် ၅၀၀ ဗုံး၊ မီးလောင်ဗုံး၊ လက်နက်ကြီး ကျည်ဆံများနှင့် လက်ပစ်ဗုံးများကို အဓိကထုတ်လုပ်ပေးနေပြီး ညောင်ကျိုးကျသွားပါက ကပစ စက်ရုံများကို အလွယ်တကူဝင်ရောက် တိုက်ခိုက်ယူနိုင်သည့် အခြေအနေဖြစ်သည့်အတွက် စစ်ကောင်စီ က အဆိုပါ ကပစ စက်ရုံများတွင်ပါ စစ်အင်အားတိုးချဲ့ထားကြောင်း သိရသည်။
ဧရာဝတီတိုင်းမ်
